ಪ್ರಸಿದ್ದ ಉಪಹಾರ ಗೃಹದಿಂದ 25 ಸಮೋಸಗಳನ್ನು ಆರ್ಡರ್ ಮಾಡಿದ ವೈದ್ಯನೊಬ್ಬ 1.40 ಲಕ್ಷ ರೂ. ಗಳನ್ನು ಕಳೆದುಕೊಂಡ ಘಟನೆ ಮುಂಬೈನಲ್ಲಿ ನಡೆದಿದೆ.
ವಂಚನೆಗೊಳಗಾದ ವೈದ್ಯ ಮತ್ತು ಅವರ ಸಹೋದ್ಯೋಗಿಗಳು ಕರ್ಜಾತ್‌ ನಲ್ಲಿ ಪಿಕ್ನಿಕ್ ಅನ್ನು ಯೋಜಿಸಿದ್ದರು. ಹೀಗಾಗಿ ಪ್ರಯಾಣಕ್ಕಾಗಿ ಸಮೋಸಾಗಳನ್ನು ಆರ್ಡರ್ ಮಾಡಿದ್ದರು. ಅವರು ಆನ್ ಲೈನ್ ನಲ್ಲಿ ಉಪಾಹಾರ ಗೃಹದ ದೂರವಾಣಿ ಸಂಖ್ಯೆಯನ್ನು ಹುಡುಕಿ ನಂತರ ಆರ್ಡರ್ ಮಾಡಿದರು. ಅವರು ಸಂಖ್ಯೆಗೆ ಕರೆ ಮಾಡಿದಾಗ, ಉತ್ತರಿಸಿದವರು ಮುಂಗಡವಾಗಿ 1,500 ರೂ ಪಾವತಿಸಲು ಹೇಳಿದರು ಎಂದು ಪೊಲೀಸರು ಹೇಳಿದರು.
ಈ ವೇಳೆ ಆರ್ಡರ್ ದೃಢೀಕರಣ ಮಾಡಲು ಮತ್ತು ಹಣವನ್ನು ಆನ್ ಲೈನ್ ಕಳುಹಿಸಲು ಬ್ಯಾಂಕ್ ಖಾತೆ ನಂಬರ್ ನಮೂದಿಸುವಂತೆ ಡಾಕ್ಟರ್ ಗೆ ವಾಟ್ಸಪ್ ಮೆಸೇಜ್ ಒಂದು ಬಂತು. ಡಾಕ್ಟರ್ 1500 ರೂ ಕಳುಹಿಸಿದರು. ಆದರೆ ವಂಚಕ ವ್ಯಕ್ತಿಯು ಪಾವತಿಗಾಗಿ ವೈದ್ಯರು ವಹಿವಾಟು ಐಡಿಯನ್ನು ರಚಿಸಬೇಕು ಎಂದು ಹೇಳಿದರು. ಒಂದನ್ನು ರಚಿಸಲು ಸೂಚನೆಗಳನ್ನು ಅನುಸರಿಸುವಾಗ, ಅವರು ಮೊದಲು 28,807 ಮತ್ತು ಒಟ್ಟು 1.40 ಲಕ್ಷ ರೂ. ಗಳನ್ನು ಕಳೆದುಕೊಂಡರು” ಎಂದು ಪೊಲೀಸರು ಮಾಹಿತಿ ನೀಡಿದರು.
ವೈದ್ಯ ನೀಡಿದ ದೂರಿನಂತೆ ಬೋಯಿವಾಡಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
