ಶಾಸ್ತರ ಫ್ರೆಂಡ್ಸ್ ವತಿಯಿಂದ ಹಾರ್ಪಳದಲ್ಲಿ ಸಂಭ್ರಮದ ಕೆಸರುಡೊಂಜಿ ಗೌಜಿ ಕ್ರೀಡಾಕೂಟ

ಕಡಬ: ನೆಲ್ಯಾಡಿ ಗ್ರಾಮದ ಕುತ್ರಾಡಿ – ಹಾರ್ಪಳದಲ್ಲಿ ಶಾಸ್ತರ ಫ್ರೆಂಡ್ಸ್ ನೇತೃತ್ವದಲ್ಲಿ 6ನೇ ವರ್ಷದ ಕೆಸರುಡೊಂಜಿ ಗೌಜಿ ಕ್ರೀಡಾಕೂಟ ನಡೆಯಿತು.
ಶಾಸ್ತಾರ ಫ್ರೆಂಡ್ಸ್ ಅಧ್ಯಕ್ಷ ಅನಿಲ್ ರೈ ಹಾರ್ಪಳ ಸಭಾಧ್ಯಕ್ಷತೆ ವಹಿಸಿದ್ದರು. ಸುರೇಶ್ ಪಡಿಪಂಡ ಎಲ್ಲರನ್ನು ಸ್ವಾಗತಿಸಿ ಪ್ರಸ್ತಾವಿಕವಾಗಿ ಮಾತನಾಡುತ್ತ, ಶಾಸ್ತರ ಫ್ರೆಂಡ್ಸ್ ಸಾಮಾಜಿಕ ಕಳಕಳಿಯ ಸದುದ್ದೇಶದಿಂದ ಆರಂಭಗೊಂಡ ಯುವ ಸಂಘಟನೆ, ಪ್ರತಿ ತಿಂಗಳಲ್ಲಿ ಎರಡು ಶ್ರಮದಾನಗಳಲ್ಲಿ ಭಾಗವಹಿಸುತ್ತ ನಿರಂತರ ಸಾಮಾಜಿಕ ಕೆಲಸಗಳಲ್ಲಿ ಭಾಗಿಯಾಗಿದೆ. ಕ್ರೀಡಾಕೂಟಗಳಲ್ಲಿ ಭಾಗವಹಿಸುತ್ತಾ ಹಲವಾರು ಪ್ರಶಸ್ತಿಗಳನ್ನು ಪಡೆದಿದೆ ಎಂದರು.

ಖ್ಯಾತ ಜ್ಯೋತಿಷಿ ಶ್ರೀಧರ ಗೋರೆ ದೀಪ ಬೆಳಗಿ ಉದ್ಘಾಟಿಸಿ ಮಾತನಾಡುತ್ತ, ಇಂತಹ ಕಾರ್ಯಕ್ರಮ ಯಶಸ್ವಿಯಾಗಿ ನಡೆಯಲು ಕಾರಣ ಶಾಸ್ತರೇಶ್ವರನ ಮಹಿಮೆ, ಕ್ಷೇತ್ರದ ಹೆಸರಿನಲ್ಲಿ ಧ್ವನಿ ಸುರುಳಿ ಬಿಡುಗಡೆಗೊಳ್ಳುತ್ತಿರುವುದು ಸಂತಸದ ವಿಷಯ ಎಂದರು. ಅಂಕಣ ಉದ್ಘಾಟನೆ ಮಾಡಿದ ನಿವೃತ್ತ ಸೇನಾನಿ ರಾಮಚಂದ್ರ ಪುಚ್ಚೇರಿ ಈ ಮಣ್ಣಿನಿಂದ ರಾಷ್ಟ್ರ ಮಟ್ಟದ ಕ್ರೀಡಾ ಪಟುಗಳು ಹುಟ್ಟಿ ಬರುವಂತಾಗಲಿ ಎಂದು ಶುಭ ಹಾರೈಸಿದರು. ಸೇವಾಭಾರತಿಯ ಸೇವಾ ನಿರತ, ಉದ್ಯಮಿ, ನೈಮಿಷ ಹೌಸ್ ಅಫ್ ಸ್ಪೈಸೆಸ್ ಮಾಲೀಕ ಬಾಲಕೃಷ್ಣ ಮಾತಾನಾಡಿ ಶಾಸ್ತರ ಫ್ರೆಂಡ್ಸ್ ಹಾರ್ಪಳ ಇವರ ಮುಂದಿನ ಎಲ್ಲಾ ಕಾರ್ಯಕ್ರಮಗಳಿಗೆ ನನ್ನ ಪ್ರೋತ್ಸಾಹವಿದೆ ಎಂದರು. ವೇದಿಕೆಯಲ್ಲಿ ಶಿವಣ್ಣ ಪಿ ಹೆಗ್ಗಡೆ, ಗಣೇಶ್ ಕಲಾಯಿ, ಸುಂದರ ಗೌಡ ಅತ್ರಿಜಾಲು, ಧನಂಜಯ ಕೊಡಂಗೆ, ಆಶಾ ಜೋಗಿತ್ತಾಯ, ಕೊರಗಪ್ಪ ಗೌಡ ಬಾಯಾತ್ರೋಡಿ, ಶಿವ ಪ್ರಸಾದ್ ದುಗ್ಗಲ, ಶಿವಪ್ರಸಾದ್ ಮೂಲೆಮನೆ, ಜಯಪ್ರಕಾಶ್ ಕಾನಮನೆ ಮೊದಲಾದವರು ಉಪಸ್ಥಿತರಿದ್ದರು.

ಸಾಧಕರಿಗೆ ಸನ್ಮಾನ:
ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ ಗಂಗಾಧರ ಶೆಟ್ಟಿ ಹೊಸಮನೆ, ಜೀ ಕನ್ನಡ ಕಾಮಿಡಿ ಕಿಲಾಡಿ ಸೀಸನ್ 4 ಖ್ಯಾತಿಯ ದೀಕ್ಷಿತ್ ಗೌಡ, ರಾಜ್ಯಮಟ್ಟದ ಭಜನಾ ತರಬೇತುದಾರ ಹರೀಶ್ ನೆರಿಯ ರನ್ನು ಈ ಸಂದರ್ಭದಲ್ಲಿ ಸಂದರ್ಭದಲ್ಲಿ ಸನ್ಮಾನಿಸಲಾಯಿತು.