ದೇಶದಲ್ಲಿ ಮಕ್ಕಳ ಸ್ಮಗ್ಲಿಂಗ್ ನಡೆಯುವ ಟಾಪ್ 5 ರಾಜ್ಯಗಳಲ್ಲಿ ಕರ್ನಾಟಕಕ್ಕೆ ಸ್ಥಾನ ಸಿಕ್ಕಿದೆ. ಕೋವಿಡ್ ನಂತರ ರಾಜ್ಯದಲ್ಲಿ ಮಕ್ಕಳ ಕಳ್ಳಸಾಗಣೆ 18 ಪಟ್ಟು ಏರಿಕೆ ಕಂಡಿದೆ. ಮಕ್ಕಳನ್ನು ಅಪಹರಣ ಮಾಡುವ ದಂಧೆಕೋರರು ಅವರನ್ನು ಕಾನೂನು ಬಾಹಿರ ಚಟುವಟಿಕೆ ನಡೆಸಲು ಬಳಸಿಕೊಳ್ತಾರೆ. ಹೆಣ್ಣು ಮಕ್ಕಳನ್ನು ವೇಶ್ಯಾವೃತ್ತಿಗೆ ನೂಕುತ್ತಾರೆ. ಇಂಥಾ ದಂಧೆಗೆ ಕಡಿವಾಣ ಹಾಕಲು ಸರ್ಕಾರ, ಪೊಲೀಸ್ ಇಲಾಖೆ ಏನು ಮಾಡ್ತಿದೆ? ಜವಾಬ್ದಾರಿಯುತ ನಾಗರಿಕರಾಗಿ ನಾವು ಏನು ಮಾಡಬೇಕು?
ಕರ್ನಾಟಕ ರಾಜ್ಯದಲ್ಲಿ ಮಹಿಳೆಯರ ನಾಪತ್ತೆ ಕೇಸ್‌ಗಳು ಹೆಚ್ಚಾಗ್ತಿವೆ ಅನ್ನೋ ಸುದ್ದಿ ಇತ್ತೀಚೆಗಷ್ಟೇ ಸಿಕ್ಕಾಪಟ್ಟೆ ಸದ್ದು ಮಾಡಿತ್ತು. ಇದೀಗ ನಮ್ಮ ರಾಜ್ಯದಲ್ಲಿ ಮಕ್ಕಳ ನಾಪತ್ತೆ ಕೇಸ್‌ಗಳೂ ಹೆಚ್ಚಾಗ್ತಿವೆ. ಈ ಮಕ್ಕಳು ತಾವೇ ತಾವಾಗಿ ನಾಪತ್ತೆ ಆಗ್ತಿಲ್ಲ. ಬದಲಾಗಿ ಈ ಮಕ್ಕಳನ್ನ ಕಿಡ್ನಾಪ್ ಮಾಡಿ ಸ್ಮಗ್ಲಿಂಗ್ ಮಾಡಲಾಗ್ತಿದೆ. ಮಕ್ಕಳ ಕಳ್ಳಸಾಗಣೆ ನಮ್ಮ ರಾಜ್ಯದಲ್ಲಿ ವಿಪರೀತ ಹೆಚ್ಚಾಗಿದೆ. ಇಡೀ ದೇಶದಲ್ಲೇ ಕರ್ನಾಟಕ ನಂಬರ್ 1 ಸ್ಥಾನಕ್ಕೆ ಏರುವಂತಾಗಿದೆ. ಕೊರೊನಾ ನಂತರ ನಮ್ಮ ರಾಜ್ಯದಲ್ಲಿ ಮಕ್ಕಳ ಸ್ಮಗ್ಲಿಂಗ್ ಕೇಸ್‌ಗಳು 18 ಪಟ್ಟು ಹೆಚ್ಚಾಗಿದೆ. ಇದಕ್ಕೆ ಕಾರಣ ಏನು? ಕಳ್ಳಸಾಗಾಣಿಕೆ ಮಾಡಲಾದ ಮಕ್ಕಳು ಎಲ್ಲಿಗೆ ಹೋಗ್ತಾರೆ? ಅವರ ಭವಿಷ್ಯ ಏನು?
ಗಾಬರಿ ಬೀಳಿಸುತ್ತಿವೆ ಅಂಕಿ ಅಂಶಗಳು! ಮಕ್ಕಳ ಕಳ್ಳಸಾಗಣೆ ಪ್ರಕರಣಗಳು ವರ್ಷದಿಂದ ವರ್ಷಕ್ಕೆ ಏರಿಕೆ ಆಗುತ್ತಲೇ ಇದೆ. ದೇಶಾದ್ಯಂತ ಎಲ್ಲ ರಾಜ್ಯಗಳಲ್ಲೂ ಏರಿಕೆ ಆಗುತ್ತಿರುವ ಮಕ್ಕಳ ಕಳ್ಳಸಾಗಣೆ ಪ್ರಕರಣಗಳನ್ನು ಗಮನಿಸಿದರೆ, ಕರ್ನಾಟಕದಲ್ಲಿ ಶೇಕಡಾವಾರು ಪ್ರಮಾಣ ಹೆಚ್ಚಾಗಿದೆ. ಆದರೆ ಸಂಖ್ಯೆಗಳ ವಿಚಾರಕ್ಕೆ ಬಂದರೆ ಉತ್ತರ ಪ್ರದೇಶದಲ್ಲಿ ಅಧಿಕವಾಗಿದೆ. 2016 ರಿಂದ 2022ರವರೆಗಿನ ಅಂಕಿ ಅಂಶಗಳು ಇಲ್ಲಿವೆ.
ಉತ್ತರ ಪ್ರದೇಶ – 1,214 ಬಿಹಾರ – 703 ಆಂಧ್ರ ಪ್ರದೇಶ – 210 ಕರ್ನಾಟಕ – 110 ದಿಲ್ಲಿ – 106
2016 ರಿಂದ 2019ರ ಅವಧಿಯನ್ನು ಕೋವಿಡ್ ಪೂರ್ವ ಎಂದು ಪರಿಗಣಿಸಲಾಗಿದೆ. ಇನ್ನು 2019 ರಿಂದ 2022ರ ಅವಧಿಯನ್ನು ಕೋವಿಡ್ ಉತ್ತರ ಎಂದು ಈ ವರದಿಯಲ್ಲಿ ಪರಿಗಣಿಸಲಾಗಿದೆ. ಈ ವರದಿಯನ್ನ ಕೈಲಾಶ್ ಸತ್ಯರ್ಥಿ ಮಕ್ಕಳ ಸಂಸ್ಥೆ ಹಾಗೂ ಗೇಮ್ಸ್‌ 24×7 ಸಂಸ್ಥೆಗಳು ಜಂಟಿಯಾಗಿ ಸಿದ್ದಪಡಿಸಿವೆ. ಈ ವರದಿಯ ಪ್ರಕಾರ ಶೇಕಡಾವಾರು ಪ್ರಮಾಣದಲ್ಲಿ ಕರ್ನಾಟಕ ಮೊದಲ ಸ್ಥಾನದಲ್ಲಿ ಇದೆ. ಏಕೆಂದರೆ, ಕೋವಿಡ್ ಪೂರ್ವದಲ್ಲಿ ನಮ್ಮ ರಾಜ್ಯದಲ್ಲಿ ಮಕ್ಕಳ ಕಳ್ಳಸಾಗಣೆ ಪ್ರಕರಣ ಕೇವಲ 6 ಇತ್ತು. ಆದರೆ ಕೋವಿಡ್ ನಂತರ ಈ ಸಂಖ್ಯೆ 110ಕ್ಕೆ ಏರಿಕೆ ಆಗಿದೆ. ಸಂಖ್ಯೆಗಳ ವಿಚಾರದಲ್ಲಿ ಕರ್ನಾಟಕ ರಾಜ್ಯ ದೇಶದಲ್ಲೇ 4ನೇ ಸ್ಥಾನದಲ್ಲಿ ಇದೆ ಆದರೂ ಶೇಕಡಾವಾರು ಏರಿಕೆಯಲ್ಲಿ ಮೊದಲ ಸ್ಥಾನ ಗಿಟ್ಟಿಸಿದೆ ಅನ್ನೋದು ನಿಜಕ್ಕೂ ಆತಂಕಕಾರಿ ವಿಚಾರ.
ಸ್ಮಗ್ಲಿಂಗ್ ಬಲೆಗೆ ಬೀಳುವ ಮಕ್ಕಳು ಏನಾಗ್ತಾರೆ? ಮಕ್ಕಳು ಇದ್ದಕ್ಕಿದ್ದಂತೆಯೇ ನಾಪತ್ತೆ ಆಗಿಬಿಡುತ್ತಾರೆ. ಆರಂಭದಲ್ಲಿ ಮಕ್ಕಳು ತಾವೇ ತಾವಾಗಿ ಎಲ್ಲಿಯಾದರೂ ಕಾಣೆ ಆಗಿರಬಹುದಾ ಅನ್ನೋ ಆತಂಕ ಪೋಷಕರಿಗೆ ಇರುತ್ತದೆ. ಆದರೆ, ಪೊಲೀಸರ ತನಿಖೆ ವೇಳೆ ಮಕ್ಕಳ ಸುಳಿವೇ ಸಿಗೋದಿಲ್ಲ. ಈ ಹಂತದಲ್ಲಿ ಮಕ್ಕಳು ಕಳ್ಳಸಾಗಣೆದಾರರ ಜಾಲಕ್ಕೆ ಸಿಲುಕಿದರೆ ಅವರಿಗೆ ನಿಜಕ್ಕೂ ನರಕ ದರ್ಶನವೇ ಆಗಿಬಿಡುತ್ತೆ.
ಕಳ್ಳಸಾಗಣೆದಾರರು ಮಕ್ಕಳನ್ನು ಅಪಹರಣ ಮಾಡಿ ಅವರನ್ನು ಮಾರಾಟ ಮಾಡಲಾಗುತ್ತದೆ. ಇಂಥಾ ಮಕ್ಕಳನ್ನು ಮನೆಗಳಲ್ಲಿ ಸಂಬಳ ಕೊಡದೆ ದುಡಿಸಲಾಗುತ್ತದೆ. ಈ ಮಕ್ಕಳ ಪೈಕಿ ಹೆಣ್ಣು ಮಕ್ಕಳಿದ್ದರೆ ಅವರ ಮೇಲೆ ಲೈಂಗಿಕ ದೌರ್ಜನ್ಯ ಕೂಡಾ ನಡೆಯೋ ಸಾಧ್ಯತೆ ಇರುತ್ತದೆ. ಇದನ್ನ ದೇಶೀಯ ಗುಲಾಮಗಿರಿ ಎನ್ನಲಾಗುತ್ತೆ. ಮಕ್ಕಳನ್ನು ಸ್ಮಗ್ಲಿಂಗ್ ಮಾಡಿ ಹೋಟೆಲ್‌ಗಳು, ಕಾರ್ಖಾನೆಗಳಲ್ಲಿ ದುಡಿಸಲಾಗುತ್ತದೆ. ನಿಂದಿಸಿ ಮಾನಸಿಕ ಹಿಂಸೆ ನೀಡಲಾಗುತ್ತದೆ. ಇದನ್ನ ಬಾಲಕಾರ್ಮಿಕ ಪದ್ದತಿ ಎನ್ನಲಾಗುತ್ತೆ. ಒಂದು ವೇಳೆ ಮಕ್ಕಳ ಪೋಷಕರು ಸಾಲ ತೆಗೆದುಕೊಂಡಿದ್ದರೆ, ಅಥವಾ ಮಕ್ಕಳು ಕೆಲಸ ಮಾಡಲು ಒಪ್ಪದಿದ್ದಾಗ ಅವರನ್ನು ಬಂಧಿಸಿ, ಕೆಲವು ವೇಳೆ ಕಾಲಿಗೆ ಚೈನ್ ಕಟ್ಟಿ ದುಡಿಸಲಾಗುತ್ತದೆ. ಇಂಥವರನ್ನ ಬಂಧಿತ ಕಾರ್ಮಿಕರು ಎನ್ನುತ್ತಾರೆ. ಬಂಧಿತ ಮಕ್ಕಳ ಪೈಕಿ ಅಪ್ರಾಪ್ತ ಯುವತಿಯರು ಇದ್ದರೆ ಅವರನ್ನ ನಗರ ಪ್ರದೇಶಗಳಿಗೆ ಕಳ್ಳಸಾಗಣೆ ಮಾಡಿ ವೇಶ್ಯಾವಾಟಿಗೆ ಅಟ್ಟಲಾಗುತ್ತದೆ. ಇಂಥಾ ಯುವತಿಯರು ಏಡ್ಸ್‌ನಂಥಾ ಮಾರಕ ಕಾಯಿಲೆಗಳಿಗೂ ತುತ್ತಾಗಬಹುದು. ಮಕ್ಕಳನ್ನು ಕಳ್ಳಸಾಗಣೆ ಮಾಡುವವರು ಅವರ ಕೈ ಕಾಲುಗಳಿಗೆ ಹಾನಿ ಮಾಡಿ ಅವರನ್ನು ಭಿಕ್ಷಾಟನೆ, ಕಳ್ಳತನದಂಥಾ ಅಕ್ರಮ ಚಟುವಟಿಕೆಗಳಿಗೂ ಬಳಸಬಹುದು. ಮಕ್ಕಳ ಕಳ್ಳಸಾಗಣೆ ಪ್ರಕರಣಗಳಲ್ಲಿ ಅತಿ ಭೀಕರವಾದದ್ದು, ಅಂಗಾಂಗಗಳ ಕಳ್ಳಸಾಗಣೆ. ಇಂಥಾ ಪ್ರಕರಣಗಳಲ್ಲಿ ಮಕ್ಕಳ ಕಣ್ಣು, ಮೂತ್ರಪಿಂಡ, ಯಕೃತ್ ಸೇರಿದಂತೆ ಹಲವು ಅಂಗಾಂಗಗಳನ್ನು ದೇಹದಿಂದ ಹೊರತೆಗೆದು ಮಾರಾಟ ಮಾಡಲಾಗುತ್ತದೆ.
ಶಿಕ್ಷೆಗೂ ಹೆದರೋದಿಲ್ಲ ಮಕ್ಕಳ ಕಳ್ಳಸಾಗಣೆದಾರರು! ಮಕ್ಕಳ ಕಳ್ಳಸಾಗಣೆ ವಿಚಾರದಲ್ಲಿ ರಾಜಸ್ಥಾನದ ಜೈಪುರ ಪ್ರಥಮ ಸ್ಥಾನದಲ್ಲಿ ನಿಲ್ಲುತ್ತೆ. 13 ರಿಂದ 18 ವರ್ಷ ವಯಸ್ಸಿನ ಮಕ್ಕಳನ್ನು ಅಪಹರಣ ಮಾಡುವ ಕಿರಾತಕರು, ಅವರನ್ನು ಸೌಂದರ್ಯ ವರ್ದಕ ಉದ್ಯಮಕ್ಕೆ ಬಳಸಲಾಗುತ್ತದೆ. ಮಕ್ಕಳನ್ನು ಕಳ್ಳಸಾಗಣೆ ಮಾಡುವ ದೊಡ್ಡ ಜಾಲಗಳನ್ನೇ ಭೇದಿಸಲಾಗಿದೆ. ಐಪಿಸಿ ಸೆಕ್ಷನ್ 370ರ ವಿವಿಧ ಕಲಂಗಳ ಅಡಿ ಸ್ಮಗ್ಲಿಂಗ್ ಮಾಡುವವರಿಗೆ ಶಿಕ್ಷೆ ವಿಧಿಸಲಾಗುತ್ತದೆ. ಸಾಮಾನ್ಯ ಅಪರಾಧಕ್ಕೆ 5 ರಿಂದ 7 ವರ್ಷ ಶಿಕ್ಷೆ ಇದ್ದರೆ, ಸ್ಮಗ್ಲಿಂಗ್‌ನ ದೊಡ್ಡ ಜಾಲ ನಡೆಸುವವರಿಗೆ ಜೀವಾವಧಿ ಶಿಕ್ಷೆಯನ್ನೂ ವಿಧಿಸಲಾಗುತ್ತದೆ. ಕೆಲವು ವೇಳೆ ಗಂಭೀರವಾದ ಅಪರಾಧ ಸಂಚನ್ನು ನಡೆಸಿದರೆ ಐಪಿಸಿ ಸೆಕ್ಷನ್ 120 ಬಿ ಅಡಿ ಗಲ್ಲು ಶಿಕ್ಷೆ ಕೂಡಾ ವಿಧಿಸಬಹುದು. ಆದರೂ ಕೂಡಾ ಮಕ್ಕಳ ಕಳ್ಳಸಾಗಣೆ ದಂಧೆ ಅವ್ಯಾಹತವಾಗಿ ನಡೆದೇ ಇದೆ. ಇದನ್ನ ತಡೆಯೋಕೆ ರಾಜ್ಯ ಸರ್ಕಾರಗಳ ಮಟ್ಟದಲ್ಲಿ ಹಾಗೂ ಕೇಂದ್ರ ಸರ್ಕಾರಗಳ ಮಟ್ಟದಲ್ಲಿ ಪೊಲೀಸ್ ಇಲಾಖೆ, ಮಕ್ಕಳ ಕಲ್ಯಾಣ ಸಮಿತಿ ಸೇರಿದಂತೆ ವಿವಿಧ ಇಲಾಖೆಗಳ ಜಂಟಿ ತಂಡವೇ ಇರುತ್ತದೆ. ಮಕ್ಕಳ ಕಳ್ಳಸಾಗಣೆ ತಡೆಯಲು ಏನು ಮಾಡಬೇಕು? ಮಕ್ಕಳ ಕಳ್ಳಸಾಗಣೆ ಜಾಲದ ಬಗ್ಗೆ ಮಾಹಿತಿ ಸಿಕ್ಕರೆ ಏನು ಮಾಡಬೇಕು ಅನ್ನೋದ್ರ ಬಗ್ಗೆ ಸರ್ಕಾರಿ ಅಧಿಕಾರಿಗಳಿಗೆ ನಿರಂತರವಾಗಿ ಟ್ರೈನಿಂಗ್ ಕೂಡಾ ಕೊಡಲಾಗ್ತಿದೆ.
ಕಂಡವರ ಚಿಂತೆ ನಮಗೇಕೆ ಅನ್ನೋ ಮನೋಭಾವ ಜನರಲ್ಲಿ ಸಾಮಾನ್ಯವಾಗಿ ಇರುತ್ತೆ. ಅನ್ಯಾಯವನ್ನ ಕಂಡೂ ಕಾಣದಂತೆ ಸುಮ್ಮನಿರ್ತಾರೆ. ಕೆಲವೊಮ್ಮೆ ಅಪರಾಧಗಳ ವಿರುದ್ಧ ದನಿ ಎತ್ತಿದ್ರೆ ನಮಗೇ ಕಷ್ಟ ಅನ್ನೋ ಮನಸ್ಥಿತಿಯೂ ಇರುತ್ತೆ. ನಮ್ಮ ಕೆಲಸ ಕಾರ್ಯ ಬಿಟ್ಟು ಕೋರ್ಟ್, ಪೊಲೀಸ್ ಸ್ಟೇಷನ್‌ಗೆ ಅಲೆಯಬೇಕಾಗುತ್ತೆ ಅನ್ನೋ ಮನೋಭಾವವೂ ಸಹಜ. ದುಡಿಮೆ ನಂಬಿ ಬದುಕುವ ಜನಸಾಮಾನ್ಯರ ಅನಿವಾರ್ಯತೆ ಇದು. ಆದರೆ, ಮಕ್ಕಳ ವಿಚಾರ ಬಂದಾಗ ಸ್ವಾರ್ಥವನ್ನ ಪಕ್ಕಕ್ಕೆ ಇಡಬೇಕಾಗುತ್ತೆ. ಸರ್ಕಾರ ಕೂಡಾ ಜನರ ಅನಿವಾರ್ಯ ಸನ್ನಿವೇಶವನ್ನ ಗಮನದಲ್ಲಿ ಇಟ್ಟುಕೊಂಡು ಜನರಿಗೆ ಅನುಕೂಲ ಆಗುವ ರೀತಿಯಲ್ಲಿ ಹೆಲ್ಪ್‌ಲೈನ್ ನಂಬರ್‌ಗಳನ್ನ ಸ್ಥಾಪನೆ ಮಾಡಿದೆ.
ಮಹಿಳೆಯರ ಕಳ್ಳಸಾಗಣೆ ವಿಚಾರ ಅರಿವಿಗೆ ಬಂದ ಕೂಡಲೇ 1091 ಟೋಲ್ ಫ್ರೀ ನಂಬರ್‌ಗೆ ಕರೆ ಮಾಡಿ ಜನರು ಮಾಹಿತಿ ನೀಡಬಹುದು. ಮಕ್ಕಳ ಕಳ್ಳಸಾಗಣೆ ಪ್ರಕರಣದ ಮಾಹಿತಿ ಇದ್ದರೆ 1098 ನಂಬರ್‌ಗೆ ಕಾಲ್ ಮಾಡಿ ಹೇಳಬಹುದು. ಇದಲ್ಲದೆ ಮಾನವ ಕಳ್ಳಸಾಗಣೆ ನಿಷೇಧ ಘಟಕದ ದೂರವಾಣಿ ಸಂಖ್ಯೆಯೂ ಇದೆ. 080-22094506 ನಂಬರ್‌ಗೆ ಕರೆ ಮಾಡಿ ಹೇಳಿದರೆ ಪೊಲೀಸರು ಹಾಗೂ ಮಕ್ಕಳ ಕಲ್ಯಾಣ ಸಮಿತಿಗಳು ಸೂಕ್ತ ಕ್ರಮ ಕೈಗೊಳ್ಳುತ್ತವೆ. ಈ ನಂಬರ್‌ಗಳಿಗೆ ಕರೆ ಮಾಡಿದರೆ ಯಾವುದೇ ಶುಲ್ಕವೂ ಇಲ್ಲ. ಜೊತೆಗೆ ಮಾಹಿತಿ ನೀಡಿದವರ ಗುರುತನ್ನೂ ಕೂಡಾ ಪೊಲೀಸರು ಯಾರಿಗೂ ಹೇಳೋದಿಲ್ಲ.
ಸ್ಮಗ್ಲಿಂಗ್ ಹೆಚ್ಚಳ ಆಗ್ತಿರೋದು ಏಕೆ? ಮಕ್ಕಳ ಕಳ್ಳಸಾಗಣೆ ಅನ್ನೋದು ದೇಶದ ಮಟ್ಟಿಗೆ ಹೊಸದೇನಲ್ಲ. ಮೊದಲೂ ಕೂಡಾ ಮಕ್ಕಳು ನಾಪತ್ತೆ ಆಗುತ್ತಿದ್ದರು. ಈಗಲೂ ಆಗುತ್ತಿದ್ಧಾರೆ. ಆದರೆ ಕೇಸ್ ದಾಖಲಾಗುವ ಪ್ರಮಾಣ ಕಡಿಮೆ ಇತ್ತು. ಇತ್ತೀಚಿನ ವರ್ಷಗಳಲ್ಲಿ ಸರ್ಕಾರ, ರೈಲ್ವೆ ರಕ್ಷಣಾ ಪಡೆ, ಗಡಿ ಭದ್ರತಾ ಪಡೆಗಳು ಮಕ್ಕಳ ವಿಚಾರದಲ್ಲಿ ತುಂಬಾನೇ ನಿಗಾ ವಹಿಸಿವೆ. ಮಕ್ಕಳ ಕಳ್ಳಸಾಗಣೆ ತಡೆಯಲು ಪ್ರತ್ಯೇಕ ತಂಡಗಳನ್ನ ರಚನೆ ಮಾಡಿವೆ. ಹೀಗಾಗಿ, ಸಾಕಷ್ಟು ಮಕ್ಕಳನ್ನ ರಕ್ಷಣೆ ಮಾಡಲು ಸಾಧ್ಯವಾಗ್ತಿದೆ. ಮಕ್ಕಳ ರಕ್ಷಣೆ ಪ್ರಮಾಣ ಹೆಚ್ಚಾದಷ್ಟೂ ಸಹಜವಾಗಿಯೇ ಅಂಕಿ ಸಂಖ್ಯೆಗಳೂ ದೊಡ್ಡದಾಗಿ ಕಾಣ್ತಿವೆ. ಸರ್ಕಾರ ಹಾಗೂ ಭದ್ರತಾ ಪಡೆಗಳ ಈ ಕಾರ್ಯ ಹೀಗೆಯೇ ನಿರಂತರವಾಗಿ ಮುಂದುವರೆಯಲಿ. ಪೋಷಕರೇ ನೀವೂ ಕೂಡಾ ನಿಮ್ಮ ಮಕ್ಕಳ ಬಗ್ಗೆ ಜಾಗ್ರತೆ ವಹಿಸಿ.
