ನೆಲ್ಯಾಡಿ: ಶ್ರೀ ಶಾಸ್ತಾರೇಶ್ವರ ದೇವಸ್ಥಾನದಲ್ಲಿ ಧರ್ಮಭ್ಯುದಯ ಧರ್ಮ ಶಿಕ್ಷಣ ತರಗತಿಗಳ ಪ್ರಾರಂಭೋತ್ಸವ

27/10/2026

ನೆಲ್ಯಾಡಿ: ಶ್ರೀ ಶಾಸ್ತಾರೇಶ್ವರ ದೇವಸ್ಥಾನದಲ್ಲಿ ಧರ್ಮಭ್ಯುದಯ ಧರ್ಮ ಶಿಕ್ಷಣ ತರಗತಿಗಳ ಪ್ರಾರಂಭೋತ್ಸವ

ನೆಲ್ಯಾಡಿ: ಮಕ್ಕಳಲ್ಲಿ ಧಾರ್ಮಿಕ ಸಂಸ್ಕಾರ, ನೈತಿಕ ಮೌಲ್ಯಗಳು ಹಾಗೂ ಸಾಮಾಜಿಕ ಸಾಮರಸ್ಯವನ್ನು ಬೆಳೆಸುವ ಉದ್ದೇಶದಿಂದ ಶೃಂಗೇರಿ ಮಠಾಧೀಶರ ಅಪೇಕ್ಷೆಯಂತೆ ನೆಲ್ಯಾಡಿ ಗ್ರಾಮದ ಕುತ್ರಾಡಿ ಹಾರ್ಪಳ ಶ್ರೀ ಶಾಸ್ತಾರೇಶ್ವರ ದೇವಸ್ಥಾನದಲ್ಲಿ ಅ.25ರಂದು ಧರ್ಮಭ್ಯುದಯ ಧರ್ಮ ಶಿಕ್ಷಣ ತರಗತಿಗಳ ಪ್ರಾರಂಭೋತ್ಸವ ಕಾರ್ಯಕ್ರಮ ನಡೆಯಿತು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶೀನಪ್ಪ ಗೌಡ ಬರಮೇಲು ವಹಿಸಿದ್ದರು. ನೆಲ್ಯಾಡಿಯ ಜ್ಯೋತಿಷಿ ಶ್ರೀಧರ ಗೋರೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಶುಭ ಹಾರೈಸಿದರು.
ಮುಖ್ಯ ಉಪನ್ಯಾಸ ನೀಡಿದ ಪಟ್ಲೂರು ಶ್ರೀ ರಾಮ ಶಾಲೆಯ ಮುಖ್ಯಗುರು ಚಂದ್ರಶೇಖರ್ ಶೇಟ್ ಅವರು ಮಾತನಾಡಿ ಹಿಂದೂ ಸಮಾಜದ ಮಕ್ಕಳಿಗೆ ಧರ್ಮ ಶಿಕ್ಷಣದ ಕೊರತೆಯಿಂದ ಎದುರಾಗುತ್ತಿರುವ ಸಮಸ್ಯೆಗಳು, ಅಸ್ಪೃಶ್ಯತೆ ಹಾಗೂ ಮೇಲು-ಕೀಳು ಎಂಬ ಭಾವನೆಗಳಿಂದ ಸಮಾಜದಲ್ಲಿ ಉಂಟಾಗುವ ಪರಿಣಾಮಗಳ ಕುರಿತು ಮನಮುಟ್ಟುವಂತೆ ವಿವರಿಸಿದರು. ಮಕ್ಕಳಿಗೆ ಬಾಲ್ಯದಿಂದಲೇ ಧಾರ್ಮಿಕ ಶಿಕ್ಷಣದೊಂದಿಗೆ ಮಾನವೀಯ ಮೌಲ್ಯಗಳು, ಸಮಾನತೆ ಮತ್ತು ಪರಸ್ಪರ ಗೌರವದ ಸಂಸ್ಕಾರವನ್ನು ನೀಡುವುದು ಅಗತ್ಯವೆಂದು ತಿಳಿಸಿದರು.

ಪುತ್ತೂರು ತಾಲೂಕು ಸಮಿತಿಯ ಬಾಲಕೃಷ್ಣ ಬೋರ್ಕರ್ ಹಾಗೂ ಆರ್.ಸಿ. ನಾರಾಯಣ ಅವರು ಧರ್ಮ ಶಿಕ್ಷಣದ ಮಹತ್ವವನ್ನು ವಿವರಿಸಿದರು. ದೇವಸ್ಥಾನದ ಅಧ್ಯಕ್ಷ ಸುಂದರ ಗೌಡ ಅತ್ರಿಜಾಲು, ಬೆಳ್ತಂಗಡಿ ವಲಯ ಉಪ ವಲಯ ಅರಣ್ಯಾಧಿಕಾರಿ ರವಿಚಂದ್ರ ಪಡುಬೆಟ್ಟು ಹಾಗೂ ಧನಂಜಯ ಗೌಡ ಕೊಡಂಗೆ ಅವರು ಕಾರ್ಯಕ್ರಮವನ್ನು ಉದ್ದೇಶಿಸಿ ಶುಭ ಹಾರೈಸಿದರು.

ದೇವಸ್ಥಾನದ ಪ್ರಧಾನ ಅರ್ಚಕ ಶ್ರೀಧರ ನೂಜಿನ್ನಾಯ, ಧನಂಜಯ ಆಚಾರ್ಯ, ಚಂದ್ರಶೇಖರ್ ರೈ ರಾಮನಗರ, ಧನಂಜಯ ಗೌಡ ಮಧುಶ್ರೀ, ರಘುನಾಥ ರೈ ಹಾರ್ಪಳ, ಚಂದ್ರಶೇಖರ್ ಬಳ್ಳಿತಡ್ಡ ಹಾಗೂ ಕಡಬ ತಾಲೂಕು ಸಮಿತಿಯ ಉಮೇಶ್ ಸಾಯಿರಾಮ್, ಜನಾರ್ದನ ಆರಿಗ ಉಪಸ್ಥಿತರಿದ್ದರು.

ರುಕ್ಮಯ ಗೌಡ ದಗ್ಗೋಡಿ, ಶಿವರಾಮ ಗೌಡ ಮಕ್ಕಿಗದ್ದೆ, ಸೀತಾರಾಮ ಗೌಡ ಕಾನಮನೆ, ಅನಿಲ್ ರೈ ಹಾರ್ಪಳ, ಶಿವಪ್ರಸಾದ್ ಮೂಲೆಮನೆ, ರಮೇಶ್ ಗೌಡ ನಾಲ್ಗುತ್ತು, ಗುಡ್ಡಪ್ಪ ಗೌಡ ತಿಮರಡ್ಡ, ಯೋಗಿಶ್ವರಿ ಪುಳಿತ್ತಡಿ, ದೇಜಪ್ಪ ಹೊಸಮನೆ, ರಾಧಾಕೃಷ್ಣ ಹುಣಸೆಬೆಟ್ಟು, ಬಾಲಕೃಷ್ಣ ಗೌಡ ಹಾರ್ಪಳ, ರತ್ನಕುಮಾರಿ, ಶಿವಪ್ರಸಾದ್ ದುಗ್ಗಲ, ದೀಪಕ್ ಹಾಗೂ ರವಿಚಂದ್ರ ಅತ್ರಿಜಾಲು ಅವರು ಆಗಮಿಸಿದ ಅತಿಥಿಗಳಿಗೆ ವೀಳ್ಯದೆಲೆ-ಅಡಿಕೆ ನೀಡಿ ಸ್ವಾಗತಿಸಿದರು.

ಮಾತಾಜಿ ಹಾಗೂ ಶ್ರೀಮಾನ್‌ಗಳಿಗೆ ಗೌರವ
ಧರ್ಮ ಶಿಕ್ಷಣ ಕಾರ್ಯಕ್ರಮದ ಅಂಗವಾಗಿ ಮಾತಾಜಿ ಹಾಗೂ ಶ್ರೀಮಾನ್‌ಗಳಾಗಿ ಆಯ್ಕೆಯಾಗಿರುವ ವಸಂತಿ ದಗ್ಗೋಡಿ, ಚಿತ್ರ ಪಡಿಪಂಡ, ಶಂಕರ್ ಪಡುಬೆಟ್ಟು, ಭಾಗೀರಥಿ ಹುಣಸೆಬೆಟ್ಟು, ಯೋಗಿಶ್ವರಿ ಪುಳಿತ್ತಡಿ, ಯಾದವ ಶೆಟ್ಟಿ ರಾಮನಗರ, ರಜನಿ ಟೀಚರ್, ರತ್ನಾವತಿ ಉಳಿತೊಟ್ಟು, ಸಂಕೇತ್ ಶೆಟ್ಟಿ ಕೊಲ್ಯೊಟ್ಟು ಹಾಗೂ ಶೀನಪ್ಪ ಬರಮೇಲು ಅವರನ್ನು ಗೌರವಿಸಲಾಯಿತು.

ಭಾಗೀರಥಿ ಹುಣಸೆಬೆಟ್ಟು ಕಾರ್ಯಕ್ರಮ ನಿರ್ವಹಿಸಿದರು. ರಜನಿ ಮಾತಾಜಿ ಸ್ವಾಗತಿಸಿದರು, ಬಾಲಕೃಷ್ಣ ಗೌಡ ಹಾರ್ಪಳ ವಂದಿಸಿದರು.

ಕೊರಗಪ್ಪ ಗೌಡ ಸ್ಮರಣಾರ್ಥ 300 ಊಟದ ತಟ್ಟೆ ಹಸ್ತಾಂತರ
ಇತ್ತೀಚೆಗೆ ನಿಧನರಾದ ಊರಿನ ಗೌಡರಾದ ಕೊರಗಪ್ಪ ಗೌಡ ಬಾಯ್ತ್ರೋಡಿ ಅವರಿಗೆ ಕಾರ್ಯಕ್ರಮದಲ್ಲಿ ಮೌನ ಪ್ರಾರ್ಥನೆ ಸಲ್ಲಿಸಿ ಗೌರವ ನಮನ ಸಲ್ಲಿಸಲಾಯಿತು. ಅವರ ಸ್ಮರಣಾರ್ಥ ದೇವಸ್ಥಾನಕ್ಕೆ 300 ಊಟದ ತಟ್ಟೆಗಳನ್ನು ಹಸ್ತಾಂತರಿಸಲಾಯಿತು.